განგაში იტალიაში-ევროპის ყველაზე საშიში ვულკანი იღვიძებს

ნეაპოლთან ვულკანი “კამპი ფლეგრეი” იღვიძებს. უკვე რამდენიმე დღეა მსოფლიო მედია აქტიურად წერს იტალიის მთავრობს გეგმის შესახებ, რომელიც ადამიანთა მასობრივ ევაკუაციას ეხება, საუბარია ათიათასობით ადამიანის ევაკუაციაზე. ამის მიზეზი კი ვულკანის ამოფრქვევის გაზრდილი საფრთხეა. რეალური საფრთხის საფუძველს კი მიწისძვრების სერია იძლევა, რომელიც არ ჩერდება. მხოლოდ გასულ თვეში 1100-ზე მეტი მიწისძვრა მოხდა. გასულ კვირას 4.2 მაგნიტუდის სიმძლავრის მიეისძვრა დაფიქსირდა, რაც ამ მხარეში ოთხი ათწლეულის განმავლობაში ყველაზე ძლიერი მიწისძვრაა.

ექსპერტების თქმით გაზრდილი სეისმური აქტივობა სავარაუდოდ დაკავშირებულია გეოლოგიურ მოვლენასთან, როდესაც დედამიწის ზედაპირის ნაწილი თანდათან მაღლდება. ამ მოვლენას ბრადისეიზმი ეწოდება.

ვულკანოლოგების ვარაუდით ამოფრქვევის გარდაუვალი საფრთხე არ არსებობს, მაგრამ ის ფაქტი, რომ მიწა თვეში 1,5 სმ-ით მაღლა იწევს, შემაშფოთებელია.

სამოქალაქო დაცვის მინისტრის განცხადებით, უკიდურესი აუცილებლობის შემთხვევაში მოსახლეობის ევაკუაცია განხორციელდება.

ვულკანი “კამპი ფლეგრეი” სამხრეთ იტალიაში, ნეაპოლის ჩრდილო-დასავლეთით მდებარეობს. იგი ევროპაში ერთ-ერთი ყველაზე საშიში სუპერვულკანია. როგორც მეცნიერები ვარაუდობენ, ამოფრქვევის შემთხვევაში მისი სიძლიერე ვეზუვის სიძლიერეს გაუთანაბრდება.